के छ शीतल निवासमा तयार भएको १२ बुँदेमा ?
शीतल निवासमा एमाओवादी, कांग्रेस, एमाले र मधेसी मोर्चाका नेताहरुबीच आन्तरिक, द्धिपक्षीय र संयुक्त छलफलको क्रम चलिरहेको छ । कार्यदलका सदस्य खिमलाल देवकोटाका अनुसार आजै सहमति हुने सम्भावना छ ।
स्रोतका अनुसार कार्यदलले १२ बुँदे सहमतिको प्रस्ताव शीर्ष नेताहरुलाई बुझाएको छ । जसमा आगामी जेठ २२ गते संविधानसभाको निर्वाचन गर्ने र त्यसका लागि प्रधानन्यायाधीशकेा नेतृत्वमा अन्तरिम चुनावी मन्त्रिपरिषद् गठन गर्ने उल्लेख छ । उक्त मन्त्रिपरिषद् ७ देखि ११ सदस्यीय हुनेछ । चुनावलाई लक्षित गरी एक महिना विशेष मतदाता नामावली दर्ता अभियान चलाउने र १८ वर्ष उमेर पुगेका नेपाली नागरिकलाई मतदानको अधिकार दिने पनि कार्यदलले सहमति गरेको छ ।
यस्तै सरकार सञ्चालनका लागि समन्वय गर्न उच्चस्तरीय राजनीतिक परामर्श समिति गठन गरिनेछ । प्रधानन्यायाधीश नेतृत्वको सरकारले तोकिएको समयमा चुनाव गराउन नसके उच्चस्तरीय राजनीतिक परामर्श समितिले नयाँ चुनावी सरकार गठनबारे निर्णय गर्नेछ ।
यस्तै आगामी मंसिरमा स्थानीय निकायको निर्वाचन गर्ने कार्यदलको प्रस्ताव छ । प्रस्तावमा चुनावका लागि बाधा अड्काउ फुकाउ आदेशका लागि सिफारिस, सेनामा समायोजन भएका लडाकूहरुको दर्जा निर्धारण र निर्वाचन आयोग लगायतका नियुक्ति बाबुराम सरकारले नै उल्लेख रहेको श्रोतले जनाएको छ ।